Biography / شبنم شکیل

شبنم شکیل 

12 مارچ اردو کی منفرد ادیبہ اور شاعرہ شبنم شکیل کا یوم پیدائش ہے۔

شبنم شکیل 

شبنم شکیل 12 مارچ 1942ءکو لاہور کے ایک بہت نامور ادبی گھرانے میں پیدا ہوئیں۔ ان کے والد سید عابد علی عابد کا شمار اردو ادب کے معماروں میں ہوتا ہے۔ اور والدہ محترمہ بلقیس عابد علی بھی افسانہ نگاری میں اپنی پہچان بنا چکی تھیں۔ دونوں علم دوست اور درس و تدریس سے تعلق رکھتے تھے، یوں شبنم شکیل کو علم و ادب سے محبت وراثت میں ملی۔ پنجاب یونیورسٹی سے ایم اے اردو کے بعد انہوں نے بھی اپنے والد کی طرح اپنی عملی زندگی کا آغاز درس و تدریس سے کیا۔ شبنم شکیل نے ادبی دنیا میں اپنی پہچان بنانے کے لیے اپنے والد کا سہارا نہیں لیا۔ انہوں نے ادب کو تنقید، افسانہ نگاری اور شاعری میں بہت نایاب تخلیقات سے نوازا ۔ حکومت پاکستان نے ان کی خدمات کے اعتراف کے طور پر انہیں صدارتی تمغہ برائے حسن کارکردگی سے بھی نوازا۔
2 مارچ 2013 کو اردو ادب کی یہ خوبصورت شمع ہمیشہ کے لیے ملک عدم کی تاریکیوں میں جا سوئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انتخاب کلام
٭٭٭٭٭٭٭٭
ہم راہ مرے کوئی مسافر نہ چلا تھا
دھوکا مجھے خود اپنی ہی آہٹ سے ہوا تھا

مسدود ہوئی جس کی ہر اک راہ سراسر
اس صف میں مجھے لا کے کھڑا کس نے کیا تھا

جنبش ہی سے ہونٹوں کی جو کچھ سمجھو تو سمجھو
اس گنگ محل میں تو بس اتنا ہی روا تھا

تعمیر ہوئے گھر تو گئے جانے کہاں وہ
جن خانہ بدوشوں کا یہاں خیمہ لگا تھا

دھندلائے خد و خال گر اس کے تو عجب کیا
دیکھے ہوئے یوں بھی اسے یگ بیت گیا تھا

شب شعلہ بداماں تو سحر سوختہ ساماں
دو روپ بدلتا تھا عجب وہ بھی دیا تھا