Biography of صفیہ شمیم

 *صفیہ شمیم *

27 مارچ نامور خاتون شاعرہ صفیہ شمیم کا یوم پیدائش ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان کی خواتین شعرا میں ایک منفرد نام صفیہ شمیم27 مارچ 1920 کو ملیح آباد میں ایسے گھرانے میں پیدا ھوئیں جو معزز و مقتدر ھونے کے علاوہ نہایت باذوق گھرانا تسلیم کیا جاتا تھا ۔ جس میں شاعری کئی پشتوں سے چلی آ رھی تھی ۔ چنانچہ شمیم صاحبہ کے مورث اعلیٰ حسام الدولہ تہور جنگ نواب فقیر محمد خان گویا سے لیکر آپ کے پرنانا نواب محمد احمد خان احمد تعلقدار کسمنڈی اور نانا نواب بشیر احمد خان تعلقدار ملیح آباد تک کوئی بزرگ ایسا نہین ھے جو صاحبِ دیوان شاعر نہ ھو ۔ شاعرِ انقلاب جوش ملیح آبادی صفیہ شمیم صاحبہ کے حقیقی ماموں تھے۔ اس خاندانی تعلق کی موجودگی میں شمیم صاحبہ کا شعری ذوق بجا طور پر موروثی کہلانے کا مستحق ھے ۔

صفیہ شمیم صاحبہ کا قیام عموما لکھنو میں رہا اور وہیں سے ابتدائی تعلیم حاصل کی ۔ اور اس کے بعد گھر پر علمی شوق پورا کرتی رہیں ۔ اور یہیں انہیں وہ ادبی صحبتیں نصیب ہوئیں جن کی بدولت ان کا فطری شاعرانہ مذاق پروان چڑھا ۔ تقسیم ہند کے بعد آپ اپنے شریک حیات کے ساتھ پاکستان تشریف لے آئیں ۔ اور راولپنڈی میں قیام پذیر ہوئیں ۔ آپ کا کلام مختلف ادبی رسائل " ماہِ نو ، ساقی ، مخزن اور ھمایوں وغیرہ میں اکثر شائع ہوتا رہا ۔ صفیہ شمیم صاحبہ نے دس سال کی عمر میں شعر کہنا شروع کیا ۔ وہ حضرت جوش ملیح آبادی کے رنگ سے خاصی متاثر تھیں۔ محترمہ شمیم غزل ، نظم ، رباعی غرضیکہ ہر صنف میں طبع آزمائی کرتی رہیں ۔ آپ کے کلام میں رومانوی عنصر غالب ھے مناظر فطرت کی تصویرکشی میں آپ کو کمال حاصل تھا۔ یہی وجہ ہے کہ اپنے دور میں ان کا مقام صف اول کی شاعرات میں کیا جاتا تھا ۔ آپ پاسبان کی نائب مدیرہ اور صبح نو کی مدیرہ بھی رہیں ۔ آپ کا انتقال راولپنڈی میں 20 ستمبر 2008 ء کو ہوا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

انتخاب کلام

٭٭٭٭٭٭٭٭

امیدیں مٹ گئیں اب ہم نفس کیا 

نشیمن کی خوشی رنج قفس کیا

بسر کانٹوں میں ہو جب زندگانی 

بہار خندۂ گل یک نفس کیا

مری دیوانگی کیوں بڑھ رہی ہے 

بہار آئی چمن میں ہم نفس کیا

نہ ہو جب رنگ آزادی چمن میں 

تو پھر اندیشۂ قید قفس کیا

بہار نو کی پھر ہے آمد آمد 

چمن اجڑا کوئی پھر ہم نفس کیا

صفیہ شمیم 

صفیہ شمیم